La pirámide asturiana, ¿úla? Un cenciellu análisis sobre la crisis demográfica que padez Asturies

L’otru día sentía pela radio pública asturiana una entrevista pola celebración del cuarenta aniversariu de l’hospital universitariu d’Avilés y, d’ente tolo que faló la persona entrevistada quédeme sobre manera col datu de qu’esi centru foi creáu, en gran parte, pola creciente necesidá d’atender l’enorme númeru de partos qu’había nesa fastera asturiana. Nesi sen, pudi deducir qu’esi centru médicu, nel so entamu taba especializáu na infancia, ye dicir, na pediatría. Pero nos tiempos actuales, según se cuntaba nesi alderique radiofónicu, l'hospital ta camudando y tresformandose nun centru especializáu sobremanera na atención a les persones mayores. Namás fai falta entrar nun hospital pa obtener una radiografía de lo que ye güei en día Asturies.

Ya entamábemos a ser fai cosa d’una década ún de los pueblos coles tases de natalidá más baxes, coles tases d’emigración más altes y con una de les poblaciones más avieyaes del continente européu. A día de güei podemos dicir que ya somos el país cola sociedá más avieyao, con menor natalidá y coles tases d’emigración más altes. Vamos ensin frenos haza’l desaniciu d’Asturies como pueblu. Esto ye lo que nos dexaron n’herencia los treinta años de gobiernos de la FSA-PSOE n’Asturies cola complicidá de los gobiernos socialistes y populares nel parllamentu español. ¿Pero fuisteis quien a ver a algún gobiernu asturianu o español preocupáu por ello? 

Pueblos ensin xente, villes ensin mocedá, ciudades ensin guahes. En llegando’l fin de semana o les vacaciones siempres llega algún neñu pequeñu al pueblu, en primeres resulta gracioso ver cómo tola xente anda detrás d’esos rapacinos pa garralos en cuello, pa enredar con ellos, pa presta-yos atención, pa contemplalos… Un pueblu enteru pidiendo vez p’acoricar l’únicu rapacín que l’aldea tien l’honor de recibir unos díes a l’añu. En primeres ye gracioso, pero cuando ún se para a analizalo ye permurnio. Y esta escena repítese na metá de los pueblos asturianos. Una situación asemeyeda a cuandu a la puerte la cueva onde taba’l neñu Xesús llegaben xentes de toles partes d’oriente mediu a contemplar al rapacín que diba ser “el salvador”. De xuru que la mayoría de los neños y neñes que nacen n’Asturies nun se llamen Xesús, pero son, de xuru, los que van decidir el futuru d’esti pueblu. 

Foi va poco, fadrá cosa d’un añu como muncho, cuando entamó a saltar l’alarma y ya hai dalgunes persones, asociaciones ya instituciones qu’entamen a glayar a l’altu la lleva que nos vien enriba una crisis demográfica a la qu’hai que ponéi remediu darréu si nun queremos qu’un kahos económicu y insostenible, mayor tovía que l’actual, llegue a les cases de les asturianes y asturianos. El sistema socio-económicu asturianu cimblando al borde l’abismu, entá tovía más.

Faigamos un mui cenciellu análisis. Imaxinemos lo que tien que ser una pirámide poblacional. Na parte d’abaxo, ye dicir, na base d’esa pirámide, colocaríase’l númeru de nacimientos anual y, de seguío, pondríemos en cada peldañu superior un añu d’edá más qu’el peldañu anterior, polo que na parte alta, ye dicir, nel vértice d’esa pirámide taríen les persones más lonxeves del pueblu. Les pirámides que los exipcios construyeron fai ya miles d’años siguen en pie, en parte, porque se decataron de que la base de la estructura tenía que ser más ancha que la picota. ¿Alguién ye quien a construyir daqué asemeyao a una pirámide cola población asturiano? La rempuesta ye non. Podemos añadir un factor más al problema ensin facelu muncho más complexu, como por exemplu daqué que-y preocupe muncho a la sociedá: les pensiones. Toa una vida trabayando y cotizando pa que te quede una paga decente cuandu fines la etapa llaboral. Basándonos nel sistema económicu actual nel que les pensiones páguenles los cotizantes n’activo, ye dicir, les perres de la paga de los xubilaos vien del lo que cotiza a la seguridá social la xente que trabaya. ¿Dalguien ye quien a iguar la fórmula matemática cola que sostener un sistema de pensiones nel que hai más pensionistes que xente n’activo? Evidentemente, esti ye un exemplu mui simple, ya qu’hai otros modelos económicos pa garantizar les pensiones coles que se podría iguar esti tema, pero lo que pretendo con ello ye amosar la antinatural distribución demográfico que vivimos nel nuesu pequeñu país. 

¿Y la mocedá que tenemos que facer? Ta claro que tornar a tener guahes al ritmu d’entamos del sieglu XX onde en cada casa había 7 o 8 hermanos podría ser una solución, siempre y cuando lo que se quiera ye iguar el kahos sustituyéndolu por otru kahos estremáu. La sociedá nun ta preparao actualmente p’asumir esi modelu reproductivu que quedó ya, demomentu, pa la hestoria. Nesi sen, lo que ta nidio ye que tener fíos por tener fíos nun ye una solución sólida si nun esiste un sistema socio-económicu qu’ampare y protexa la infancia y a los adultos. A parte, desdendencia tien que tenelo aquella xente que quiera tenelo ensin tar presionaos nin condicionaos pol entornu. Nel mesmu sen, nun se pue tolerar un modelu nel que la xente que sí que quier tenelos tenga qu’esperar a casique los 40 años p’algamar les condiciones “menos males” pa poder criar y educar a unos fíos en condiciones dignes y estables. Pan, techu, educación y salnidá pa la reciella y eso mesmo amás de, trabayu digno pa los adultos. Esi sedría’l modelu ideal y al que na mio opinón hai qu’aspirar. 

Evidentemente, dende’l puntu que partimos güei col desequilibriu demográficu extremu que padez Asturies ye imprescindible que los gobiernos entamen a plantegar medides d’urxencia coles qu’entamar a iguar esta crisis poblacional que pue trayer muchos problemes y quebraderos de cabeza nel presente y futuru al nuestru pueblu. Entamando por aparar darréu la emigración de la mocedá con planes específicos pal desendolcu académicu, llaboral y social de la mesma y acompañao de ayudes a la natalidá y de lleis qu’aseguren la posibilidá de criar a la reciella de forma digna y estable. Quiciabis una opción meyor que’l famosu “cheque-bebé” onde’l gobiernu paga una subvención por tener fíos, sedría garantizar llegalmente que cada neñu o neña nacíu vaya a tener un entornu estable y dignu pa la so crianza: baxes por maternidá/paternidá d’una duración coherente, escolines y escueles públiques y accesibles pa cualesquier persona tanto nes arees urbanes como nes faasteres rurales, horarios llaborales pa los padres y madres compatibles pa cola crianza de la reciella, etc. A fin de cuentes les dos víes consisten en inyectar perres nel fomentu de la natalidá pero la forma de facer esa inversión ye totalmente distinta, nuna garantices que los padres tengan un dineru extra, mentanto que nel otru asegures que la sociedá tenga a l’alcance toles facilidaes, infraestructures y medios necesarios pa la bona crianza de la reciella.

                Hai milenta fórmules más pa iguar esta crisis demográfica cola que tornar a tener una estructura poblacional natural  y sana pal bon furrulamientu d’un pueblu, pero lo que de xuru que nun ye eficaz ye l’actitú pasiva y inmovilista de los gobiernos asturianos y españoles d’estos postreros 30 años. Ye necesario tener claro que les situaciones como estes pasen por algo y qu’esti mal padecémoslu tolos pueblos que tamos nel extraradiu de lo qu’agora son los núcleos de poder económicu y de toma de decisiones del sistema neollibral. L’aniciu d’esti procesu entamó cola desindustrialización d’estos pueblos periféricos, la siguiente fase ye la que tamos padeciendo agora mesmo, ye dicir, la crisis demográfica y perda ablucante de población, coles sos consecuencies nel desaniciu cultural y nel desarraigu de la población cola que se consigue que los habitantes cada vegada sientan más lloñe’l vínculu con una tierra y con una cultura concreto y, la tercer fase, sedría la de la perda completa y definitiva de la poca soberanía que-y queda a esi pueblu, quedando’l so futuru en manes de los intereses económicos externos.

             Lleguen tiempos nos que vamos tener que sentir falar muncho de cómo iguar la estructura poblacional y la crisis demográfica n'Asturies, y por ello ye perimportante informase y tar atentos pa que nun decidan tamién dende fuera de les nuestres llendes cómo igualo, sinon que seyan les asturianes y asturianos los que decidan, escriban y faigan el so futuru.

¿Contra-cultura o cultura revolucionario?

  Fai algo más d’una década n’Asturies entamó a espoxigar el fenómenu de les Feries d’Abril. Ya foron munchos los pueblos y conceyos que vieron pasar esti eventu peles sos cais y incluso n’alguna villa llegó a asitiase y a sustituir cualesquier otru festexu popular y tradicional. Ta nidio qu’esto ye un fenómenu d’aculturización, más si cabe cuandu dende munches institucions s’impulsen estos eventos con perres públiques y en detrimentu y perxuiciu de les folixes tradicionales y autóctones. Nesi sen, podemos dicir qu’esti fenómenu y los sos impulsores tan actuando como contribuyentes a la “contra-cultura”, ye dicir, una cultura foriata que se intenta imponer consciente y subconscientemente sobre la orixinaria. 

  Pero nun son les Feries d’Abril les propulsores y vanguardistes n’aculturización que se sufre n’Asturies. Nin tampoco son les culpables del mal del nuestru pueblu. Equí el procesu d’aculturización y de contra-cultura vien de va tiempu. Dende la prohibición y negación de la llingua propia dende va sieglos y que tovía llega a los nuestros díes, el menospreciu del teatru fecho n’Asturies demientres los sieglos XIX y XX onde lo culto namás tenía cabida si yera forastero y en castellán, la anulación y desaniciu de les seleiciones deportives asturianes (onde un bon exemplu d’ello ye la celebración d’el centenariu de la federación asturiana de fútbol con un partíu de la seleición española), l’abandonu del patrimoniu arquitectónicu y arqueolóxicu, l’atapecimientu de la nuestra hestoria… o mesmamente valnos con echar una güeyada a la programación de la televisión asturiana, a la prensa o a la programación cultural de munchos conceyos pa ver en qué llugar queda lo propio. Son centenares los exemplos onde podemos güeyar el segundu planu qu’ocupa siempres la cultura asturiano, gobernao y xestionao siempre por esa élite “contra-cultural”.

  Y ¿que ye qu'a la sociedá asturiano préstanos más lo forastero que lo propio? Fuimos siempres un pueblu que recibió colos brazos abiertos a cualesquier persona que venía equí a ganáse’l pan, a trabayar na industria, na mina, na marina, etc. Siempre nos prestó recibir, agospiar y integrar a los llegaos de fuera, toos ellos bienllegaos. Y quiero pensar que la nuesa ye una cultura que s’impregnó positivamente un poco de toa esa xente que camudó el so sitiu d’orixe pola nuestra tierra. Quiero pensar que fuimos y vamos siguir siendo bonos anfitriones. Pero eso enxamás fixo que nós dexáremos de querer y creyer na nuesa hestoria, cultura y tradición. Tradiciones y cultures surdíes dende’l pueblu y feches pal pueblu, onde se xeneraba un ambiente d’eso qu’al asturianu y al forasteru siempre-yos prestó asgaya: la folixa.

  Pero ta nidio que nos tiempos que güei vivimos de globalización cada vegada se fai más complicao caltener les tradiciones populares, y la tendencia ye adoptar los eventos y folixes que más-y interesen a la cultura dominante: el sistema capitalista. Esa cultura qu’acaba con too y namás dexa aquello que-y interesa al capital, aquello que tea de moda y que-y de’l beneficiu que busca. Aculturización como ferramienta de desaniciu de los raigaños milenarios d’un pueblu. Pue ser que l’avance d’esi procesu aculturizador tamién tea favorecíu pol gran problema demográficu que se ta padeciendo n’Asturies y pola emigración forzao en masa de la mocedá, ya que ensín xente mozo a la que tresmitiyos la cultura, tradiciones y valores d’un pueblu menor va ser el raigañu y el vínculu haza lo autóctono y más fácil ye imponer el sistema de vida qu’el capital quiera pa esta tierra… pero esi ye otru tema.

  ¿Y como se combate esa contra-cultura? Ponese a la escontra de les folixes como les Feries d’Abril que se faen equí pue ser útil ente una parte de la sociedá ya concienciao. Quiciabis algunos pocos non concienciaos con esa estratexa tamién abran los güeyos y entamen a esmolecese polo propio. Pero camiento que esa nun ye la meyor estratexa pa cola gran parte de la población. La xente, cansao de trabayar precariamente, de garrar buses, trenes, aviones, atascos de coche, estrés d’horarios, cansao de tragar inxusticies nel so día a día… esa xente nun quier griesques cuando se-yos ofrecen unos díes de distraición nes cais del so pueblu, da-yos un poco igual el conteníu, lo que busquen ye escaecer l’agobiu y afoguinos selmanales. Porque nenguna cultura y nenguna folixa ye meyor qu’otra por ser d’un pueblu o d’otru. Toes tienen les sos coses divertíes y les sos coses más aburríes según el güeyu dende’l que se mire.

  Nesi sen, quiero pensar que la forma más acertada de combatir la contra-cultura nun ye facer una crítica destructiva y adoptar una actitú de confrontación directa, sinon defendese d’ello con una de les meyores virtues que tien el ser humanu: la capacidá de crear. Esi don que tien la nuesa especie y que tan escaecíu tenemos cada vegada más. Crear, construyir, facer. Llevantase del sillón, organizase y fabricar dinámiques, proyectos, eventos y folixes onde impere y se normalice la cultura asturiano. Facer al pueblu dueñu de les sos folixes coles sos propies idees. Y que la defensa del patrimoniu del pueblu nun seya depresivu, nin frustrante, nin murniu, si non disfrutando de facelo. Interactuando, construyendo, faciendo camín, creando cultura revolucionario. Non sufirendo pola cultura asturiano, si non viviéndo la cultura asturiano.